前幾日突然想上去坪山碧嶺，搭巴士去馬巒山郊野公園入口。尋日行完山，狀態好，就今日上去。
今朝試吓係咪喺上水站出閘行一個圈，再入返閘去羅湖會平一半。於是八點二就去到上水，出站行去上水中心、新都廣場、上水廣場，然後返去上水站入閘。原來都係慳六蚊！
去到羅湖八點九，過關。落去搭1號線去老街。去到老街唔記得落車。有兩個選擇，下一個站大劇院轉2號線去崗廈北，或者搭到去崗廈，再轉10號線上崗廈北。最後都係喺崗廈北搭14號線。十點零七分到坪山錦龍站。D出口出站。呢個唔係總站。如果驚冇位想早幾個站上巴士，要轉16號線去六和、坪山圍。
D出口出站。外面就係坪山大道。
唔使過馬路(對面係A出口)，前行就係巴士站。
唔使一分鐘巴士到站。上車拍深圳通，車費¥1.60。呢架巴士好細。記得只可以坐約十個人。
我坐喺司機後面個空位。空位係畀輪椅客嘅。冇輪椅客可以拉低張凳坐。
到沙坑二路路口，下一個站就到總站。
由錦龍地鐵站搭到總站要四十分鐘。
十點五十分到郊野公園入口。唔理咁多，打卡先。
睇呢個地圖不如睇高德。今日行程由公園嘅西北入口開始，沿山谷裡面嘅「碧嶺瀑布群步道」上山。行完呢段之後再算。
沿車路行。車路左邊係一條溪，溪邊有一條泥路。早知行落去溪邊，至少有樹蔭，唔使暴曬。
原來溪邊條路到此為此。再行都要走返上來呢條車路
今日唔想去梅沙，只係想去華僑城、三洲田、鹽田。睇左邊嘅路就啱嘞。
一間食肆
園區入口有一個閘。要先掃左個二維碼至可以進入。個二維碼其實只係一條link，迫人睇防火措施。
進入步道。
西北門就係剛才經過嘅郊野公園入口。「手作步道」估計是一條土路或者係泥路。睇個方向係走埋去山邊，都係行瀑布群步道好。
轉右離開車路，過橋進入澗谷內的步道。
整條步道都在這條澗旁邊。一時在左，一時在右。
第一個瀑。
不准下水。若在香港，石上早已坐滿人。
要爬石級，唔算容易行。
走上一層，有一段平路可以回氣。
遠處又有一個瀑
近看那個瀑
又要爬樓梯
瀑頂
谷內有風有樹蔭，不過氣溫高，當然成身汗。
喺呢度同一個龍友傾吓。我話我去華僑城、鹽田。佢話佢知道可以去華僑城，但佢未去過。
呢條橋前面有個涼亭。到呢度都十一點半，要飲啖水，食件雪芳蛋糕。
又走上一層。
跟鹽田方向走。行嗰條「手作步道」就喺呢度接返呢條步道。果然，行手作步道冇得睇瀑布。
一路沿住個澗谷上山。
我記得碧三路。湯坑都唔知喺邊。當然係去碧三路。
睇地形，似到山頂，可以放鬆慢慢行啩？
又有一個瀑，即係仲要繼續上。
唔見有瀑布喎
咁細都叫「九天瀑」？
呢個都係細啫。
瀑布頂有欄杆。
走上去瀑布頂向下望。
後面又有一個瀑
行到九天瀑，仲要上一段好高嘅山坡。
臨尾上咁多石級，好攰。
呢次真係行完嘞。喺呢度見有三母女喺度摘竹芯。
地圖寫住「鐵門」。原來就係呢個閘。
冇人守。
跟住行一條好路出去。
終於上到山上出口。
乜個出口咁嘅？條路去到鐵網，叫人爬出去？乜嘢指示都冇。地盤外面係一條公路，應該就係碧三路。
鐵網左側有一條泥路，唯有行呢條泥路，應該係去出口啩？
果然有出口。出去就係碧三路。
到碧三路，記得方向，應該轉左。
轉右呢邊係落返去坪山嘅。
沿住條碧三路行。一個人都唔見。只係有時有車經過。開住個百度地圖，一路行去華僑城。
有橋、有火車建築，不見一個人。整個區看來很破落，似已被丟荒很久
沿碧三路前行到迴旋處。轉左去東部華僑城。直行是鹽三路落梅沙。鹽三路好長嘅，去茶溪谷吧。
開始見有遊人了。
看這形勢，似係去左個一就快倒閉嘅遊樂場。
當然唔會入去。就喺外面坐低食嘢，就快一點鐘了。今日只帶一支770ml Bonaqua，三件蛋糕。喺步道食左一件。行到呢度，飲幾啖水，食一件蛋糕，仲有一件做後備。
之前睇過地圖知道譚仙廟、三洲田水庫、雲海廣場。去到茶溪谷已經好熱好攰，邊度近去邊度，三洲田水庫剛才經過了，譚仙廟、嶂頂那邊太遠，去雲海廣場吧。不過路程都好遠，預左要行到三、四點了。
睇住地圖行。
真係有小火車喎。
前行不遠左手邊有一條石級路，係上梅沙尖嘅。冇力上啦，仲得半支水。
再行前小小，就係庚子首義雕塑園。見到當然要走埋去打卡。
後面有一條瀑布。見有人走上去。旁邊有一條石級路向上。
又行返出條車路。睇地圖，行呢條路要兜一個大彎。喺庚子首義雕塑園有條捷徑，可能就係雕塑右邊嗰條石級。不過見係石級，就唔行咯。行返條車路兜大圈啦。行到呢度有啲驚，水已經得返半支。今朝行到而家已經流左超多汗，飲左半支水都未夠補。仲有唔知幾遠路至到雲海廣場。睇地圖要兜完個大圈，再轉左落去，經過兩個水庫至到廣場。去到嗰度至有補給。不過呢條路竟然有車行。有車行就可以call滴滴。咁都定啲。仲見有架巴士行。架巴士好細架。睇真啲，好似見到「雲海廣場」四個字。
轉左個大彎，開始上山。我先至睇真個地形。原來條路係繞過一個山谷，上去對面個山坡。地圖嗰條捷徑其實唔係一條橫山徑，而係一條直上嘅樓梯。
行上去嗰陣，知道身體太缺水，開始頂唔順。於是開住遮，慢慢行上去。希望上完斜坡落山可以捱得住。上面就係「東部華僑城頂」，即係「小三洲」。我以為上面有屋，附近至少有幾間鋪啩。原來冇嘅。連嗰條捷徑嘅出口都唔見。上到去個閘口，見有兩個保安。佢話「嘩！咁熱都走上黎」。我問佢有冇水，佢指下後面，話有售賣機。有救嘞！即刻走埋去用微信買左支農夫山泉¥5.00。諗吓都係唔夠，仲有好長路。又埋去買支寶礦力¥8.00，買多一支農夫山泉。買完即飲埋帶黎嗰半支Bonaqua，食一塊Snickers朱古力。成個人精神晒。
心定晒，行得輕鬆好多。呢個時候都一點九咯，估計去到雲海廣場至少要四點鐘。
行冇耐，前面有個分岔路口。
行到呢度，見草地青綠，藍天白雲，又有涼風，好舒服。行咁耐都值得。
乜鬼抽水蓄能電站，原來係小三洲塘。仲係櫻花林。
路邊個山崗上種滿櫻花。下年一月至三月一定黎睇。
遠處就係梅沙尖。
走上去櫻花林
隨手拍都好靚
梅沙尖。
沿公路向南落山，下一個站係紅花瀝水庫，一直去雲海廣場。
小三洲塘。春天來看櫻花應該好熱鬧
到分岔路口。
呢條路去譚仙廟，可以上梧桐山。秋天一定去。
今日行到呢度已經好晏，已經兩點四。嗰邊唔知乜環境，雖然有水有乾糧，但已經晏。去雲海廣場穩陣啲
水壩附近有一個閘和更亭。更亭對面有石級路上梅沙尖。
離開小三洲落紅花瀝水庫。呢度又見有雲海廣場嘅巴士經過。兩個遊客就上左車去雲海廣場。
行十五分鐘路就見到紅花瀝水庫
梅尖沙下的紅花瀝水庫。
有個閘，唔知可唔可以入去。就跟返條公路落
終於見到雲海廣場。越來越近了。呢度向南，吹來陣陣涼風，好舒服。
竟然係公共洗手間
去雲海廣場要靠左去三洲塘水庫。轉右要兜好遠路落鹽田檢查站。雲海廣場嘅巴士又來了。呢個方向係落山去鹽田海山。不過巴士已滿座，就算那時不想去雲海廣場，揮手巴士亦不會停下來。
向右望見三洲塘水庫，塘上面就係雲海廣場。果然設計似一艘船嘅甲板。
呢一帶嘅名都有「三洲」兩個字：三洲田、三洲田水庫、小三洲、三洲塘、三洲田村。初到貴境，真係要小心睇清楚。
哦！春天還有藍花楹。
兜好大個彎至到廣場前嘅巴士站。
打卡位。今日好熱。少人到，打卡方便好多。
難得草地冇人。假期來唔使諗可以咁影相。
跟住行上去。
入去廣場打卡。
隨手拍，到此一遊。太熱太攰，冇心機細心睇。
室外都好清涼
下望鹽田港。對面係吉澳、印洲塘。
呢一邊係鹽田
鹽田港。海邊係「惠深沿海高速」
到頂層。
頂層有咖啡店
可以買杯咖啡，走上去攞本書睇吓。
可以一邊睇書一邊睇風景。室內有冷氣。
對面個山頭就係亞婆地。可以從北山路爬上去。
北面係三洲塘水庫。右邊遠處係梅沙尖。梅沙尖左邊山坡直到山坳處就係紅花瀝水庫。
喺雲海廣場逗留左十分鐘，三點廿五分就落山去鹽田。
當然唔會搭巴士落山。就喺停車場旁邊有石級落鹽田
根據資料，雲海廣場位於高度360-380米嘅山上。睇吓要行幾耐落山。
好快就有個分岔路口。右邊去石頭圍新村。睇路程遠啲喎。都係跟住「華僑新村入口」直落。後來睇返，原來去石頭圍新村好過，因為唔使行好長嘅「健康步道」去鹽田路地鐵站。
路邊有兩條大水管。
呢條路其實向南。不過當時係西斜，樹林裡面冇風。好熱。要飲埋支寶礦力、農夫山泉。三點五十二分到一個倉庫門口。到呢度已經落完石級。轉左依「洗手間」方向行一條車路繼續落山。
落到黎，仲係跟住「華僑新村入口」方向走。睇返地圖，行到尾就係鹽田海鮮街。
一路跟住地圖條灰線行，冇耐見右手邊有條火車軌，係一個平交路口。落去打卡先。
橫過平交路繼續行，條路就轉返向北。我睇地圖，呢條路嘅方向至係去地鐵站。
呢條路後段設為「健康步道」。不過好少人行。大概係下晝太熱嘞。呢條路右邊係火車路，對上山坡係亞婆地，左邊都係屏風樓。成條路似一條峽谷，冇風到，好焗好熱。
聽到火車聲。望吓右邊，原來條鐵路真係有火車行嘅。呢條叫「平鹽鐵路」，載滿貨櫃，應該係去鹽田港。
見到左邊有出口，行出去就係北山路。
由平交路去到呢條路嘅出口要廿分鐘，即係大約一公里。
去到北山路，轉右上天橋。
天橋轉右落鹽田路。
鹽田路西行幾分鐘
橫過東海路
鹽田路站D出口入站。馬路對面係E出口。不過係未開通嘅。
一路搭到去大劇院，去書城路。行左五個鐘，食左兩件蛋糕，飲左三支水。五點半鐘食晚飯。
食完仲未想返香港。搭2號線去崗廈北行吓。
崗廈北站打卡
上深南大道。
轉入海田路經過卓悅中心去福華路
喺福華路轉右，過左金田路，就行落BitCity去會展中心站。
沒有留言:
發佈留言