好耐冇上深圳行山。今日一行五人，九點鐘蓮塘口岸集合，搭2號線去海山。去到海山站，先攞一支免費水，然後由B出口出站，行深鹽路去海山路。一直行到街尾。喺雅庭國際大酒店門口就係雲海專線A嘅巴士總站。
雲海專線A上華僑城、三洲田、雲海廣場，車費¥15.00，老人咭、頤年咭不適用。今日開架大車。上車要用支付寶掃碼畀錢，微信唔得、深圳通都唔用得。司機叫我地幾個老人畀¥7.50。有人個樣太年輕，畀左¥15.00！我哋喺茶溪谷停車場落車。落車後搞錯方向，要行返轉頭。
行返出去迴旋處，過馬路直行。
橫過迴旋處直行。經過"天麓"。
到"雲海谷公眾球場"閘口。閘口後有幾個路口。跟有"大梅沙"嘅牌行。
一路行都只有車經過，一個人都冇。好正！
跟車路行。
去到"躍進水庫"，有條橋打卡。
條橋對面路邊有指示牌。呢個入口就係"廣東綠道2號綫"去馬巒山嘅入口。
前面又有閘口，所以不要再前行。
跟路牌離開車路
呢條綠道連通三洲田同馬巒山
行落去"雀籠"路。好耐之前喺百度嘅遊記已經見過，所以肯定冇行錯。
執一個波，即刻要畀¥350.00。
去到雀籠嘅盡頭，要上石級。
石級路唔算長。
跟住就係平路。
哦原來已經進入馬巒山郊野徑。深圳嘅行山徑系統新舊交接冇幾耐，有啲行山徑唔同地圖可能有幾個名。好似呢條就係，屬廣東綠道、深圳東部郊野徑、馬巒山郊野徑雲海綫。
中間呢段個路面係鐵網格。小心揸緊手機，跌左落地可能執唔返。
回頭睇到梅沙尖
行完鐵網格到水泥路，已經去到馬巒山範圍。
行到第一個路口。左邊呢個路口就係喺"雞公髻"過黎嘅鯤鵬徑十三段。
我地舊年一月十號由黃竹坑上雞公髻，就係行呢條路落到呢個路口。嗰陣呢條路仲未鋪好。
一年前呢條路就係咁樣。
過左嗰個路口，就繼續行去老圍村搵間農家菜館食午飯。呢段已經係鯤鵬徑。
黎到呢個手臂彎。跟住條車路行會行遠好多路。
於是行右邊嘅土路。呢條土路係捷徑，其實係鯤鵬徑。外面嗰條車路反而唔係。
土路邊有清晰指示牌。
上次都係行呢條路。
接返條車路(即係廣東綠道)。出口係一個彎位。
順住個方向靠右行。行行吓至發覺行錯方向，要兜好遠路至去到羅氏大屋。嗰陣至記得舊年係要轉左嘅。於是行返轉頭，返到個路口
呢條路去老圍村近好多。
去到分岔路口。已經聞到香味。
右邊就係我地幫襯過兩次嘅光背村農家樂。今日想去另外一間。
嗰間喺老圍村，就係路口再前行，經過一個車閘行落去。
老圍村
祠堂旁邊(相片右邊)就係嗰間農家菜。舊年過年前嚟冇開門。今日嚟又冇開門。睇清楚，呢間鋪已經唔做農家菜，似係賣吓水、即食麵之類嘅嘢。
於是走返轉頭去光背村。
商量過後，都係唔幫襯光背村嗰間，去羅氏大屋嗰邊嘅"馬巒山九寨溝"。嗰間大間啲。於是就行坪馬綫公路(其實都係鯤鵬徑十三段)過去羅氏大屋。
去梅亭條路就喺光背村農家樂後面。
上次呢段路唔畀人通過
跟住車路行出去。
光背村
見到梅亭。呢度種滿梅樹。過三個月嚟睇吓有冇梅花睇
我地唔上梅亭，趕住去食飯
T字路口轉右去羅氏大屋
高圳水庫
行極都未到。
見到有屋，即係行到羅氏大屋嘅十字路口。
足足行左五十分鐘至行到"羅氏大屋"，呢度而家叫"新民"村。
馬巒山的景點羅氏大屋
深圳三大遠足徑之一"翠微徑"。翠微徑主要在深圳東北的坪山、龍崗區，起點在此。翠微徑向北沿坪馬綫落馬巒山北門，鯤鵬徑轉向東南落葵涌
沿坪馬綫公路向北門走二百多米到"馬巒山九寨溝"
番石榴有乜好睇？
好在九寨溝仲喺度，冇執。有飯食
等左成個鐘至有飯食。都已經兩點鐘了。
叫燜鵝。佢真係燜左一隻鵝！
慢慢食到三點四。要埋單落山嘞。今日落坪山。
行坪馬綫公路(即係翠微徑)落山。已經就快日落，慢慢行好舒服
紅花嶺上水庫
到閘口。右邊條路係"坪山詩歌步道"。舊年行過，落溪涌、洞背嘅。
所謂詩歌步道就係路邊有好多寫上詩句嘅鐵牌，可以邊行邊讀詩句。
已經四點鐘，仲有人上山。
五十分鐘由九寨溝落到北門嘅巴士站。
巴士剛開走，幫襯巴士站嘅自助售賣咖啡機買左杯美式咖啡¥9.90
搭M479去坪山人民醫院站落車，同站轉搭E17出蓮塘。
車程約四十分鐘。五點半到羅沙路蓮塘站落車。
行去畔山路隔離條橫行買嘢。
行到去國威路，再入去坳下路買嘢。六點半至出返國威路，行去仙湖路地鐵站搭地鐵去蓮塘口岸。
仲飽，喺蓮塘口岸商業城一間"港式"嘅潮汕粉麵店食一碗崩沙腩河當晚餐。牛腩唔好食。
八點鐘過左關搭巴士返屋企。
沒有留言:
發佈留言