深圳遊記: 蓮塘口岸-沙田-淡水新不夜天-大鵬所城-黃貝嶺-蓮塘口岸

禮拜嗰日講開上淡水食雞。尋日飲茶，約實左今日上淡水，粉嶺集合。搭B7。又要企到去香園圍。過關後行去搭2號線。我知去沙田好遠，車費都要¥10，所以過免費通道。

黃貝嶺轉5號線去布吉。到布吉再轉14號線去終點站沙田。

14號線車廂有橫向座椅。

到沙田。站內有指示去搭公交去惠陽淡水。

A 出口出站。

又有指示牌去搭公交。

公交站就喺前面。

我地去「惠陽交警大隊」站，搭168B線

原來深惠2綫都可以。

睇緊個路線牌，巴士就停喺巴士站。走埋上想上車。問吓幾多錢。原來要惠州市嘅公交卡。即刻開微信交通卡睇吓，原來有「惠州通乘車碼」、「惠東公交乘車碼」兩個。於是兩個都開通。即刻用「惠州通乘車碼」上車。車費¥3。

好快就落車。其實我喺百度地圖量過，沙田站去淡水白雲一路只係2.8公里，行路半個鐘就到。帶隊話喺「惠陽交警大隊」落車。司機好人，我地上車嘈嘈閉，有人乘亂行左入去冇畀錢。

對面係交警大隊

落車向前行

幾年前來過，記得係叫「不夜天」。

行到門口，我都記得來過。

個個企喺度唔入去。連門口對出個著制服嘅都話「去呢間食啦，好出名㗎」

我都記得來過呢間鋪，見過呢啲鹹雞、鹹鵝。

間店唔滿。我地上去二樓。有個房畀我地。問會唔會加錢，伙記話一樣收費。

雞屎藤茶粿，鹹嘅，裡面有菜甫。

叫左幾砵飯。我食左小小。食剩一砵。有人連個砵都攞埋走。

蘿蔔絲餃

之前問有冇鱔。有人話有一條。就叫左一條。好好食。

食完飯，去邊好呢。有人似乎想去大鵬所城。點去呢？有人話搭車。鬼知點搭巴士咩。有人話搭的士。好吖。但成條街搵一架的士都冇。根本就冇！唔好諗，call車啦。未試過正好試吓。十個人，要三架車。我上次call過滴滴，又係喺淡水！有人話高德地圖可以叫車。我撳左入去，真係有，搞左一輪又話要驗證，等我拎左個回鄉証、中銀咭出黎搞一輪。認證後，設左畀錢嘅卡。最後都係未搞到。跟住有人叫我上微信。但我唔見個滴滴出行個小程序。最後我開微信->服務。揀「出行服務」。唔啱。再揀「電召的士」。呢個就得嘞。目的地打左「大鵬所城」，又要揀東門、西門、北門、南門、停車場。我揀左停車場。跟住出左啲車同收費嘅list。求其揀一架算了。要¥107。聽唔知邊個話「去咁遠都要成百蚊㗎」。算啦。噉我就揀左嗰架。一撳入去，就見架車當時嘅位置。五分鐘到。車牌「粵L DD15XX」。冇耐司機電話到。講普通話，大鑊！好在最後我聽到佢話喺新發。走過去就見有架白色比亞迪停喺度。應該係嘞。就上車。

路程係噉嘅：白雲四路轉去開城大道北->開城大道南

一路塞車。直到轉入大亞灣大道。喺大亞灣大道，司機去油站上廁所。

跟住上高速。我同司機講「上高速啊可？」司機話係。路費¥6，要我畀！我問點畀？用「微信」。好嘞，上高速至記得要影相做紀錄。經過呢條橋。

過牛湖山隧道。仲未到大亞灣

話就話高速，感覺似搭香港巴士噉慢。

到收費站。我畀架手機佢遞去窗口嘟。過左壩光收費站，就進入深圳。

落左深惠沿海高速，轉入坪西路，穿過「雷公山隧道」、「迭福山隧道」，轉入「鵬飛路」。一路去到大鵬所城嘅停車場。另外嗰兩架車就去左南門。

停車場好似有個閘，我叫司機唔使入去。落車。足足坐左個幾鐘。落車唔見其他人。

大鵬所城噉大，冇辦法搵到其他人嘞。我地三個自己行。我一七年來過兩次。識路。

東門入去所城。

行入去直入就係糧倉。糧倉旁邊就係廁所。我估佢地都會去廁所啩？就喺附近停留睇吓見唔見佢地。

行左去一間東江縱隊嘅紀念館。

真係木板床。幾十年冇見了。

跟住行去北門

繼續行吓西面嘅巷仔。

去到西門。就轉返去東面。

轉左行返去東面

又返到去南門街糧倉附近。糧倉已改成博物館。

睇完糧倉，出返去廣場。終於見返佢地。

跟住行南門街。

已經四點半，我話要搭成個幾鐘車出去羅湖。要走嘞。

出去南門

再行出去鵬飛路

可能剛打過車，識得點做。出到去又話打的出去羅湖。我話都幾貴喎。講講吓，行到出鵬飛路，啱啱有架M471巴士停喺度，於是即上。出到去大鵬中心落車。落車就企返喺嗰個巴士站等E26。大鵬中心係第二個站。不過冇所謂啦。查過E26經過黃貝嶺，就決定去黃貝嶺食晚飯。好快就有巴士到。上車又係嘟深圳通。呢次車費¥10。