尋日行完山飲茶又吹雞上深圳。我話各自過關，十點半蓮塘口岸等。
今朝喺上水站行過去新都廣場，落龍琛路，行去馬會道龍琛路體育館等B7。九點十五分上車，十七分開去粉嶺站。九點廿七分去到祥華邨。九點五十三分已經去到香園圍口岸。
十點左右過左關，就喺入境大堂等。省起網上有人話樓下有公交總站。於是走出去，果然見有牌寫住公交總站/的士站在B1層。於是搭電梯落去負一層。出𨋢只見係停車場，泊滿的士，似係一個的士站。四圍唔見有公交車。左手邊遠處見有一個門口，似係通去另一邊。於是走過去。門右邊係上返去大堂嘅自動電梯，行出去就係公交總站。睇完四條路線牌，就搭自動電梯上去二樓入境大堂。
十點五十分一齊出去搭2號線，黃貝嶺站D出口出站。
向前行到1號站台。等M445公交去橫排嶺。
今日好熱。十一點廿六分企喺站台等車。
十一點半車到。上車。都係用返深圳通搭公交。車費八折¥1.60。
搭巴士搭到總站，我話唔落車都唔得啦。落車十二點十八分。車程都要48分鐘。其實應該喺梧桐山市場落車，不過都冇所謂。都係一樣行返去北大門。我想睇吓個總站係點樣。記得第一次去梧桐山都係梧桐山市場站唔識落車。又係搭到總站。要行返去北門。嗰條路係喺一條河邊，仲見到有個「道姑」打扮嘅女人行過。
轉右過橋。過左條河轉右行就得。
行到河邊，就有印象嘞。返黎睇返，原來嗰次係行百年古道，日期係一六年十二月一號。
呢條深圳綠道都幾清靜。不過就幾短吓。
好快就行到梧桐山北大門。其實同喺梧桐山市場站落車差不多。
經過北大門，繼續前行去望桐路
前面轉右係望桐新路。上次我地上梧桐山廢索道站就喺前面轉左。
我地上個月就走過前面山脊上小梧桐的索道站。
佢地極力推薦嘅就係呢間食肆。
門口真係燒緊羊架。
裡面冇乜人。
坐低叫左羊架。都幾好食嘅。
半隻雞。稍乾
燒鵝例牌。唔啱我
雜菜煲
推薦我地食一條鱔。好細條嘅。
食完飯吹完水，去洪湖睇荷花。埋單每人¥70。原路行返出去搭M445。
都係行返綠道
返去橫排嶺路。差小小路就到總站，於是就轉右行去總站搭車。
過左牌坊，再行入去轉右就見街尾有公交車泊喺度。嗰度應該就係總站。
去到就開車。
兩點鐘開車，兩點四十二分返到黃貝嶺總站。
查過地圖，要搭5號線去太安站轉7號線，喺「洪湖站」出。我來過。B出口出站。
出站就落大雨。知係過雲雨。企一陣，行過去。記得右手邊有個位喺橋底穿過去。另一邊就係洪湖公園。
穿過橋底，搵路行落去公園。
行落去就見大片荷塘。
幾片相連嘅水面都有荷花。
三點十分去到，拍左半個鐘。仲未想走。
我話一路行去人民公園，再去東門啦。佢地話好。
落雨。雨停左又影。
其實嗰度又熱又焗。想飲嘢。有人想飲奈雪。於是搭地鐵去搵地方飲嘢。都好。於是又返去洪湖站。想去崗廈北去卓悅中心，順便去食飯。後來搵到笋崗萬象食家都有奈雪。下個站落車。A出口就係萬象食家。
搭𨋢上去一樓。行出去原來係商場外面嘅廣場。
行入去。奈雪喺五樓。
當然冇七個位。唯有分開坐住先。我用微信買。
都係飲西瓜沙冰解渴。都真係好熱。
飲完都成五點鐘。問想去邊度食飯。有人介紹「鮮潭」。我睇吓大眾點評。原來係打邊爐。我睇吓個APP，原來萬象食家都有分店，就喺第三層。
五點半就落到去三樓呢間鮮潭。
未有人等位。畀左一張大枱我地。先用蒸氣洗碗碟。
叫左兩條二斤重嘅魚。佢地話鱘龍
高溫蒸氣煲湯。
先飲魚湯，再火煱
每個新入會嘅都有一件鮮花餅。好香玫瑰花味。
吹水吹到七點半後至埋單。每人¥100。走之前又行吓個商場。
最後原路搭車返黃貝嶺，再轉8號線去蓮塘口岸。九點至過關。過左黎啱啱有架特別班B7開去粉嶺。十點鐘至返到屋企。
沒有留言:
發佈留言